Friday, April 3, 2020
Bismiilahiirahamnirrahim, bamulo dari awal kato iko adolah tuilsan perdana ambo diblog Salam Sambalado Tanak, baa kok banamo blog sambalado tanak, dek karano ambo sangaik suko jo masakan gaek nan banamo samba lado tanak ko, angkek samaso dahulu katiko umua alun satahun jaguang, darah alun satampuak pinang, maso itu hiduik dalam keadaan sausah, nan urang gaek laki laki karajo sebagai nelayan disalah satu kabupaten nan talatak diujuang selatan kota padang tapek nyo dinagari TARUSAN pasisia selatan.
Foto : Sambalado tanak
Dek karano gaek laki laki ambo acok mambaok bada basah nan segar pulang salabiah dijua salabiah dimasak jo gaek padusi, amak ambo paliang suko mambuek sambalado tanak ko, kok di ingek maso maso itu antahlah , itulah maso nan paliang indah didalam hiduik ambo ko, walaupun hiduik sederhana namun kenangan itu ndak akajn pernah hilang dalam ingaik tan ko.
Ambo anak katigo dari 9 bersaudara, sasuai jo pandapek ughang tuo tuo dahulu, banyak anak banyak ghasaki, makono satiok tahun batambah sudaro ambo, kecek ughang ehh.. ambo nan paliang lucu, ambo nan paliang gagah ( tampan kecek ughang kini e ) dan ambo juo nan paliang mada, kalau maso ketek ketek ijan ditanyo dunsanak, walau pun mada nan namonyo rangking di kelas lai ndak lupo ketinggalan manyangkuik thaguih hehehe...
Ambo dilahia kan ka dunia kecek gaek pado hari jumaik tahun 1982, alah bhaga kini umua ambo tun dunsanak ??,, kah kah kah, ambo lahia didumai, dek karano gaek hobby marantau, dek hiduik ko tadi juo dunsanak ' pado mhangasai hiduik dikampuang elok lah diurak langkah ka ghantau ughang untuang kok lai elok nasib tabangkik juo batang thagandam, baitulah chagito ughang gaek ambo pado maso tun
Lah samakin jauh jalur chagito blog ko, dari sambalado tanak sampai ka keluarga, hahahahaa... tak apo lah bia dunsanak deyen pado tau jo mimin nan punyo lapak ko,
Ok dunsanak ambo, intinyo blog iko adolah blog tentang masakan khusus URANG AWAK , disiko ambo akan share caro mambuek dan berbagi resep resep masakan tradisional urang minang baik nan sangaik populer maupun resep masakan minang nan jarang ditamui, tarutamo untuak dusanak dunsanak ambo nan dirantau, Tujuan ambo disiko bia indak hilang resep/rahasio dapua anduang dan resep resep masakan dari niniak niniak kito nan tadahulu.
Foto : Bandara Minangkabau
Mohon support nyo dunsanak ambo, kok adoh kato dan penulisan nan salah didalam resep resep masakan minang ko, tolong di ingaik kan, sabab manusio ko basifaik khilaf hanyo Allah yang maha benar akan segala sesuatunya. Sumbangsih dan saran dari dunsanak sangat ambo perlukan demi kelangsungan dan blog masakan iko.
Untuk saran dan krtikan nan membangun, sanak bisa contact ambo langsuang melalui email, sanak tinggal klik ' Contact diatas JUDUL BLOG' disampiang 'Home, lalu sanak kirim lah apo nan ingin dunsanak sampaikan, mudah mudahan kito bisa saliang ma isi dan saliang maingatkan. itu bana nan sangaik sangaik ambo harapkan dari dunsanak.
Besar harapan ambo, mudah mudahan blok masakan minang 'SALAM SAMBALADO TANAK iko bisa menjadi manfaat bagi dunsanak ambo sadonyo, dan bisa menjadi acuan dalam belajar dan mengenal tentang resep resep masakan minang.
Akhir kato ambo, ambo awali dengan 'Bismillah.. ambo akhiri juo dengan ' Bismillah..
Assalamualaikum Warrahmatullahi wabarrakatuh.........
Salam Author Salam Sambalado Tanak !